Safnarinn

Félagið heitir Safnarinn – listaverkaklúbbur og er í umsjón Gallerís Foldar við Rauðarárstíg.

Félagið er byggt á erlendri fyrirmynd en slík félög eru starfrækt m.a. í Danmörku og Hollandi. Félag sem þetta hentar einnig stærri starfsmannafélögum.

Mánaðarlegar greiðslur
Félagsmenn kaupa mánaðarlega inneign hjá Safnaranum að fjárhæð kr. 1.000,- og fær eitt félagsnúmer í staðinn.

Það er ekkert því til fyrirstöðu að auka framlagið, t.d. kr. 2.000,- og eiga þá tvö félagsnúmer.

Félagsmenn geta hætt hvenær sem er en fá þá inneign hjá Galleríi Fold. Ekki er hægt að fá endurgreitt þar sem fjármununum gæti þá þegar hafa verið ráðstafað til listaverkakaupa.

Hægt er að byrja hvenær sem er.

Starfstímabil félagsins
Félagið starfar frá september til ágúst ár hvert. Nýtt tímabil hefst 1. september og lýkur á Menningarnótt Reykjavíkur í ágúst, ári seinna.

Listaverk fyrir inneign
Í lok tímabilsins fá allir þátttakendur eigulegt listaverk sem er að minnsta kosti virði þess sem greitt hefur verið. Sá sem greiðir t.d. tvöfalt lágmarksframlag, þ.e. kr. 2.000.- á mánuði, fengi þá tvö listaverk - nema annað verði í boði og þá er það tilkynnt sérstaklega.

Safnarinn notar innborgað fjármagn til að kaupa listaverk á uppboðum, sýningum eða með beinum samningum við listamenn.

Skoða má keypt listaverk á heimsíðunni Safnarinn.is.

Sá sem hefur greiðslur á seinni hluta tímabilsins og á innan við kr. 5.000,- í inneign fær ekki listaverk. Þess í stað getur viðkomandi kosið að halda inneigninni fram á næsta tímabil eða fengið inneignarnótu í Galleríi Fold.

Úrvalspotturinn
Félagsmenn eiga möguleika á vinningum

Einu sinni á ári eru nöfn hluta þátttakenda dregin út og fá þeir að velja verk úr Úrvalspottinum sem hefur að geyma mun dýrari verk.

Úrvalspotturinn er dreginn út í ágúst á hverju ári en allir félagsmenn eiga möguleika á úrdrætti. Því lengur sem viðkomandi hefur greitt til félagsins því meiri möguleika á viðkomandi. Þannig fer nafn þess sem hefur greitt í eitt ár tólf sinnum í pottinn en nafn þess sem hefur greiðslur í júní einungis tvisvar.

Sá sem greiðir hærra mánaðargjald, t.d. kr. 2.000,- tvöfaldar möguleika sína í Úrvalspottinum og á í raun tvöfaldan miða.

Þegar búið er að draga út er viðkomandi látinn vita með tölvupósti.

Sá sem er dreginn út fær sérstakt lykilorð inn á heimasíðu félagsins þar sem hann merkir við hvaða verk úr Úrvalspottinum hann vill helst eiga og hvað svo og svo koll af kolli þar til öll verk hafa verið valin.

Sá sem er dreginn fyrst út hefur fyrsta valrétt og fær því það verk sem hann setur í fyrsta sæti. Sá sem á annan valrétt fær það verk sem hann hefur sett í fyrsta sæti hafi því ekki verið úthlutað þá þegar. Þannig heldur það áfram þar til allir hafa valið.

Ef einhver sem dreginn er út svarar ekki og velur ekki listaverk fer hann aftast í röðina, þ.e. hann fær síðasta valréttinn.

Listaverkakaup Safnarans
Verkin sem keypt eru verða sýnd á sérstakri sýningu á Menningarnótt Reykjavíkur í Galleríi Fold. Auk þess verða öll verkin til sýnis á vef Safnarans.

Félagsmenn munu að auki njóta betri kjara hjá Galleríi Fold.

• 10% afsláttur á listaverkum í almennri sölu
• 15% afsláttur af innrömmun
• 20% afsláttur af verðmatsþjónustu
• Félagsmönnum er boðið á sérstakar forsýningar.